کراچی ۔ 15 مئی (اے پی پی) صدر مملکت ممنون حسین آکھے جو ماضی اچ بجلی دی پیداوار سمیت بئے ترقیاتی منصوبے نہ بنڑا تے مجرمانہ غفلت کیتی گئی ہے ، جڈانجو ہنڑ ایمان دی حد تئیں یقین ہے جو پاکستان دے مسئلے مُک ویسن۔ پاکستان اچ ہنڑ بدعنوانی نہیں چل سگدی۔صدر مملکت اے گالھ گورنر ہاؤس کراچی اچ نیو ٹیک دی تقریب تقسیم اسناد نال خطاب کریندے ہوئیں آکھی ۔ ایں موقعے تے گورنر سندھ ڈاکٹر عشرت العباد خاں اتے نیو ٹیک دے ایگزیکٹو ڈائریکٹر ذوالفقار چیمہ وی خطاب کیتا۔صدر مملکت آکھیاجو پاکستان دے نوجوان اساڈا قیمتی سرمایہ ہن جنھاں دے مستقبل دی چنگی منصوبہ بندی کیتے حکومت سنجیدہ ہے۔ صدر مملکت آکھیاجو موجودہ حکومت نوجواناں کوں بامقصد تعلیم دے ذریعے انہاں کوں باعزت روزگار ڈیونڑاں چاہندی ہے ۔صدر مملکت آکھیا جو جنھاں قوماں آپنڑیں افرادی قوت دا درست استعمال کیتے او کامیاب تھیاں ہن ، ایں سلسلے اچ نیوٹیک دا ادارہ نوجواناں کوں مختلف ہنر ڈے تے نہ صرف معاشرے دا فعال رکن بنڑیندا پئے جڈانجو او ایں قابل وی تھی ونجن جو آپنڑیں ٹبر دی کفالت کرسگن۔ صدر مملکت نیو ٹیک دے اعلیٰ حکام کوں ہدایت کیتی جو نوجواناں دی تربیت بارے صنعت تے تجارت دے مختلف شعبیاں دی لوڑ کوں سامنڑیں رکھ مستقبل دی منصوبہ بندی کرن۔ انھاں آکھیا جو اقتصادی راہداری دے پورے تھیونڑ دے بعد صنعت تے حرفت دے مختلف شعبیاں اچ تجربہ کار ہنرمند افراد دی لوڑ ہوسی جیندے کیتے نوجواناں کوں تیاری کرنڑیں چاہیدی ہے ۔ صدر مملکت آکھے جو نوجوان باہرلے ملک ونج تے خدمات ادا کرنڑاں چاہندے ہن انہاں دی پیشہ ورانہ تربیت کیتے نیو ٹیک کوں باہرلے ملک افراد کار دی لوڑ کوں سامنڑیں رکھ تے تربیت ڈیونڑیں چاہیدی ہے۔ صدر مملکت ایں موقعے تے نمایاں کارکردگی دا مظاہرہ کرنڑآلے نوجواناں کوں اعزازوی ڈتے ۔
ماضی اچ بجلی دی پیداوار سمیت بئے ترقیاتی منصوبے نہ بنڑا تے مجرمانہ غفلت کیتی گئی ، صدر مملکت ممنون حسین دا گورنر ہاؤس کراچی اچ نیو ٹیک دی تقریب تقسیم اسناد نال خطاب
مضمون کا ماخذ : میگا ملینز کے نتائج
متعلقہ مضامین
.jpg)
