مارچ 23صرف پاکستان جڈانجو عالم اسلام دی تاریخ اچ خصوصی اہمیت دا ݙینھ اے جڈاں برصغیر دے مسلماناں ہک نظریہ دی بنیاد تے اںج وطن دے قیام سانڳے تاریخی قرارداد منظور کریندیں ہوئیں آپݨی جدوجہد شروع کیتی اتے ست سالیں دے عرصے اچ بے مثال تحریک اتے ٻہوں قربانیاں دے نتیجے اچ مملکت خداداد وجود اچ آڳئی۔ 23 مارچ 1940 دا ݙینھ بلاشبہ مسلمانان ہند اںج قومی تشخص دے نال آپݨے سانڳے ہک منزل دا تعین کیتا اتے اے منزل ہک اسلامی فلاحی ریاست دا قیام ہئی، ایہو وجہ اے جو قیام پاکستان دے بعد ہک قوم، ہک منزل دی سوچ پاروں پوری قوم ہر قسم دی وابستگی کوں پچھوں رکھ تے ایں ݙینھ کوں ملی جوش تے جذبے نال منیندی اے اتے وطن عزیز دے اغراض و مقاصد دی تکمیل اتے بانیان پاکستان دے خواباں کوں شرمندہ تعبیر کرݨ سانڳے ہر قسم دی تفریق اتے سیاسی مصلحتاں توں بالاتر تھی کراہیں ہک ترقی یافتہ، خؤشحال، دفاعی لحاظ نال ناقابل تسخیر مملکت سانڳے انفرادی اتے اجتماعی سطح تے ساری مساعی بروئے کار گھن آوݨ دی تجدید کریندی اے۔
یوم پاکستان بارے سپیکر قومی اسمبلی اسد قیصر “اے پی پی” نال ڳالھ مہاڑ کریندیں ہوئیں آکھیا جو 23 مارچ دا ݙینھ اساݙی ثقافت دا ٻہوں اہم ݙینھ اے اتے میں سمجھداں جو اے او ݙینھ اے جڈاں اساں آپݨی آزادی کوں شایان شان طریقے نال منیندوں۔ سپیکر قومی اسمبلی امید کیتی جو انشاء اللہ پاکستان او پاکستان ضرور بݨسی جئیں دا خواب اساݙے قائدین ݙٹھا ہئی اتے جیڑھا انہاں دا وژن ہئی۔ اڄوکی حکومت خاص طور تے قائد اعظم دے وژن دے مطابق آپݨے فور رس اقدامات کریندی پئی اے۔ ایں موقع تے دفاع وطن دے استحکام سانڳے مسلح فوج دے کردار دی تعریف کریندیں ہوئیں انہاں آکھیا جو پاک فوج اساݙے ملک دا ٻہوں وݙا اتے قیمتی اثاثہ اے اتے ایندا پاکستان دی سالمیت اتے خوشحالی اچ اہم کردار اے۔ انہاں آکھیا جو میں سمجھداں جو یوم پاکستان کوں شایان شان طریقے نال منایا ونڄے،۔
وزیر مملکت پارلیمانی امورعلی محمد خان یوم پاکستان دے پس منظر اتے مقاصد تے فکر انگیز روشنی پیندیں ہوئیں چھبدے ہوئے سوالات وی چاتے، انہاں آکھیا جواساݙے وڈکیاں پاکستان کیوں بݨایا ہئ؟ پاکستان دا مطلب کیا ہئیَ پاکستان کوں ’لا الہ الا اللہ محمد رسول اللہ‘ دے نظام دے نظام تے گھن آوݨ سانڳے صحیح کوشش کیوں نی کیتی ڳئی؟ ایندا اقتصادی نظام کیا ہووݨا چاہیدا ہئی؟ کیا اساں ہک چنگی نسل تیار کیتی، کیا اساں غلامان رسول تیار کیتن؟ اے کجھ سوال ہن جنہاں دا اساں جواب ݙیوݨا چاہیدے۔ ایں موقع تے علی محمد خان خود احتسابی دی لوڑھ کوں اجاگر کریندیں ہوئیں آکھیا جو تریوی مارچ کوں میݙا ایہو سنیھا اے جو آپݨا احتساب خود کروں۔ اسلامی فلاحی ریاست دے قیام سانڳے پاکستان تحریک انصاف دی جدوجہد اتے کامیابیاں دا تذکرہ کریندیں ہوئیں وزیرپارلیمانی امور آکھیا جو میں سمجھداں جو اڄ اساݙٰی وݙی کامیابی اے جو وزیراعظم عمران خان ” سٹیٹس کو “دے خلاف ڈٹ کراہیں کھڑن۔ انہاں آکھیا جو تحریک انصاف ہک بیانیہ تے کھڑی اے تانجو ایں ملک کوں اڳوں گھن تے ونڄݨے تاں میرٹ تے ، انصاف تے، احتساب تے اگوں گھن تے ونڄݨا چاہیدے۔ انہاں ݙسیا جو میݙا ݙاݙا پیر محمد خان آل انڈیا مسلم لیگ دا ادنیٰ کارکن ہئی، ہݨ اوندے پوترے کوں اللہ موقع ڈتے جو اگر ݙاݙے ملک بݨاوݨ اچ حصہ ڳھدے تاں اساں ملک بچاوݨ آئے ہیسے۔
امیر جماعت اسلامی پاکستان سراج الحق آکھیا جو انسانی تاریخ اچ پاکستان دا وجود اچ آوݨ بہوں وݙا واقعہ اے اتے مدینہ منورہ دے اسلامی ریاست دے عبد دنیا اچ اے ݙوجھی ریاست اے جیڑھی جو خالصتاً نظریہ دی بنیاد تے ، فلسفہ دی بنیاد تے بݨی اے اتے تریوی مارچ دی قرارداد ایں اچ اہم سنگ میل ہئی اتے ٻہوں خلوص نال لوکاں جدوجہد شروع کیتی اتے گھٹ عرصے اچ انہاں خؤاب شرمندہ تعبیر کیتا، قانون دی بالادستی، عدل و انصاف دی حکمرانی قائداعظم محمد علی جناح دا بنیادی وعدہ اتے نعرہ لاتا ہئی پر افسوسناک طور تے 74 سال گزرݨ دے باوجود اساں منزل کوں حاصل نی کر سڳے۔ سراج الحق آکھیا جو چہتر سالیں توں سٹیٹس کو اے، اج نوٹ دی عزت اے اتے ووٹ دی عزت کائنی اتے جئیں ݙے پیسہ اے او ایوان اچ آویندے اتے پیسے دی بنیاد تے جیڑھے لوک ایوان اچ آویندن او حکومت کوں آپݨے فائدے سانڳے استعمال کریندن،قوم سانڳے نی۔انہاں آکھیا جو نویں نسل توں اساݙی درخواست اے جو او آپݨا فرض پورا کرن اتے اللہ دے بݨو اتے اوندے بعد ملک پاکستان سانڳے کم کرو۔
پاکستان پیپلز پارٹی دے رہنما اتے سابق وزیر داخلہ سینیٹر رحمن ملک آکھیا جو 23 مارچ 1940 دے ݙینھ توں اتے آزادی حاصل کرݨ دے بعد جئیں انداز اچ اساں اگوں ودھدے پیوں، قوم کوں امید ہئی جو سیاستدان،سرکردہ لوک،دانشوراں سودھے معاشرے دا ہرمکتبہ فکر ایں انداز نال اگوں ودھدی جینویں قائد اعظم محمد علی جناح سبق ݙتا ہئی،بدقسمتی نال اساݙی ایں پیش قدمی اچ او رفتار کائنی رہی، میں امید کرینداں جو او قربانیاں جیڑھی پاکستان بݨاوݨ اچ ڈتی ڳئن صرف انہاں کوں سامھیں رکھیندیں ہوعیں ہر پاکستانی ملک سانڳے کم کرے۔ میڈی دعا اے جو اساں صرف جمہوریت دی ٹوپی نہ پائوں بلکہ او کم کروں جیڑھی جو جمہوریت اصل اچ اساں توں تقاضا کریندی اے۔
سینٹ دی قائمہ کمیٹی برائے دفاعی پیداوار دے چیرمین لیفٹیننٹ جنرل (ر) عبدالقیوم آکھیا جو اللہ تعالیٰ آپݨے فضل و کرم نال اساکوں ہک آزاد ملک عطا کیتے اتے اے ہک ٻہوں وڈٰی نعمت خداوندی اے جیڑھی جو 27 رمضان المبارک کوں چھیکڑی عشرے اچ ملی۔ انہاں آکھیا جو اے اتفاق کائنا ہئی اے اللہ دا انتخاب ہا، اساں ٻہوں کجھ حاصل کیتے پر آپݨی کوتاہیاں پاروں او کجھ حاصل نی کر سڳیے جیڑھا جو کرݨا چاہیدا ہئی۔ میں اے آکھݨ چاہنداں جو یک جہتی، اتفاق ہووے، میرٹ تے لوکاں کوں قومی اسمبلی، سینیٹ دے ٹکت ڈتے ونجن تانجو اولوک اڳوں آون جیڑھے جو چنگی کارکردگی ݙکھاون اتے ملک تے قوم دی خدمت کرن۔
لیفٹیننٹ جنرل (ر) عبدالقیوم آکھیا جو میں پاکستان یوتھ پارلیمنٹ دا منتخب راہبر ہاں اتے چاریں صوبیاں اچ اساں اسمبلیاں بݨائن، یوم پاکستان تے میں بقول علامہ اقبال ، انہاں کوں ایہو آکھساں،
”تو راہ نوردِ شوق ہے منزل نہ کر قبول
لیلیٰ بھی ہم نشین ہو تو محمل نہ کر قبول”
انہوں آکھیا جو نینگر اڳوں ودھن، حوصلہ نہ ہرن، او مستقبل دی قیادت ہن، مظبوط ایمان، ثابت قدمی اتے حوصلہ ݙکھاون تاں سرخروتھیسن۔
عوامی نمائندیاں ،مختلف مکاتب فکر دی شخصیات اتے سیاسی جماعتاں دے قائدین دی آراء کوں ڈیکھدیں ہوئیں بجا طور تے آکھیا وںج سڳدے جو بلاشبہ پاکستان قوم مختلف شعبیاں اچ ٻہوں کارنامے سرانجام ڈتن ، اتے ہݨ ہک واری ولا 23 مارچ 1940 جیہا جذبہ اتے ولولہ پیدا کرݨ دی لوڑھ اے اتے اساں ساریاں کوں ہک قوم ہک منزل دے عہد وفا دی تجدید کریندیں ہوئیں ملک تے قوم دی خدمت کرݨا پمسی۔
.jpg)
