سیاست عوام دی بجائے اپڑی ذات کیتے کم پاروں بدنام تھئی اے،سیاسی وابستگی توں ہٹ تے مستحقین کوں حق پچیسوں،وزیراعظم عمران خان دورہ لاہور اچ وزیراعظم کرونا ریلیف فنڈ سانگے عطیات کٹھے کرنڑ دی تقریب نال خطاب
اسلام آباد ۔ 4 اپریل (اے پی پی)وزیراعظم عمران خان آکھیے جو کرونا دی وبا اللہ ولوں ہک عذاب اتے امتحان اے،اوکھا ویلھا ہمیشہ قوماں دا امتحان ہوندے،بھل ایں ویلھے صبر کرنڑ آلے عظیم انسان بنڑ ویندن،اساں کرونا وائرس دے خلاف ہک لمبی جنگ لڑنی اے،ایں وبا توں بچنڑ ہک چیلنج اے، جڈاں قوم ایں اوکھ توں لنگھ ویسی تاں او ویلھا اج توں بہوں نویکلا ہوسی۔اے گالھ وزیراعظم عمران خان گورنر ہاوس لاہور اچ گورنر پنجاب چوہدری محمد سرور ولوں وزیراعظم کرونا ریلیف فنڈ سانگے عطیات کٹھے کرنڑ دی تقریب نال خطاب اچ آکھی اتے تقریب رکھاونڑ تے گورنر دا شکریہ ادا کیتا۔وزیراعظم آکھیا جو کرونا ہک مہلک وبا اے جیھڑی کہیں کوں نئیں چھڑیندی،سوشل میڈیا دیاں غلط گالھیں تے توجہ نہ ڈتی ونجے جو پاکستان ایندی ودھ ولھیٹ اچ نہ آسی،ایندے بارے ساکوں کوئی غلط فہمی کائنی،ساکوں ایندے توں بچنڑ کیتے احتیاطی تدابیر نئیں چھوڑنیاں۔انہاںا ٓکھیے جو پاکستان دانظریہ اسلامی فلاحی ریاست اے بھل اساں ایندے توں پریں تھی گئے ہیں،اساں ایں اوکھے ویلھے اٹھ ارب روپے دا پیکیج ڈتے اتے قوم کوں اے یقین ڈوینداں جوایں سانگے بیا پیکج وی ڈیسوں،اساں لاک داون اچ متاثرہ ہیٹلے طبقے دا خیال رکھنڑے،تعمیراتی انڈسٹری تہوں کھلوی اے جو ایندے نال لوکاں کوں روزگار ملسی،کروناٹائیگر فورس بہوں فیدہ ڈیسی ایندے ہنڑ تئیں چھی لکھ لوک رکن بنڑ چکین۔انہاں کرونا دے حوالے نال وزیراعلیٰ پنجاب دی تعریف کریندے آکھیے جو عثمان بزدار بہوں چنگاں کم کریندے پین،پنجاب اچ کم بارے چنگیاں خبراں آندیاں پین۔ انہاںا ٓکھیا جو حکومت کولو مستحق لوکاں دا ڈیٹا موجوداے ، سیاسی وابستگی توں ہٹ تے مستحقین کوں انہاں دا حق پچیسوں،اے ایم این ایز، ایم پی ایز دا امتحان اے جو اوقوم دی خدمت کرن کیوں جو اگیں سیاست عوام دی بجائے ذات کیتے کم پاروں بدنام تھئی اے۔
کوئی غلط فہمی کائنی جو کرونا پاکستان اچ بیا نہ کھنڈسی،کرونا دی وبااللہ دا امتحان اے،ایندے اچوں کامیاب تھی تے نکلسوں،وزیراعظم
مضمون کا ماخذ : prêmios lotofácil
متعلقہ مضامین
.jpg)
